bandera infosar
Pro impreare sos Agregadores de Noas RSS, incarca s'icona cun su tastu de dereta de su sorighitu e, a pustis, seletziona 'Copia Indirizzo'. Pustis copiadu su collegamentu, incolla lu in s'agregadore tuo.

papiros
cumpartzi custa noa cun sos amigos tuos invia mail stampa

Noas


06/03/2016

SA CÒRSICA 1789-2014, intre clanismu e natzionalismu

Sampiero Sanguinetti: "La Corse entre clanisme et nationalisme: Introduction à une analyse politique 1789-2014"

Sos mèdios de informatzione faeddant pagu e male de Còrsica, prus chi no àteru tratende de sa violèntzia praticada in s’ìsula. Su chi mancaiat, però, fiat un’anàlisi istòrica profunda de sas orìgines e isvilupu suo.
Pro cumpensare custu bòidu, su giornalista corsicanu Sampiero Sanguinetti at iscritu su libru La Corse entre clanisme et nationalisme: Introduction à une analyse politique 1789-2014.
S’òpera no est iscrita petzi pro sos chi s’interessant de Còrsica, ma proponet un’anàlisi sotziale, polìtica e culturale chi si podet addatare a sa cunditzione de àteras sotziedades insulares mediterràneas.
Sanguinetti mustrat de èssere unu connoschidore documentadu de sa matèria, descriende eventos e pessonàgios istòricos dae sa Rivolutzione frantzesa a dies de oe.
Su libru tratat su tema de su clanismu, unu fenòmenu sotziupolìticu isulanu chi tenet raighinas profundas e orìgines antigas. In ue unas cantas famìlias corsicanas sunt intritzidas a pare, in relatzione cun su podere de s’istadu tzentrale e su pesu issoro in sa polìtica locale.
Est craru chi si tratat de unu fenòmenu chi at tentu trasformatziones dae su tempus e dae sos ligàmenes cun Parigi. Su clanismu est istadu —e abbarrat galu— su responsàbile ptintzipale de s’immobilismu chi arressat o rallentat su cambiamentu sotziale chi s’ìsula rechedet cun urgèntzia.
Sanguinetti descriet in manera crara su panorama ideològicu de sa Còrsica: dae sa destra a sa sinistra, dae sos ecologistas a sos natzionalistas, partzidos —custos— in autonomistas e indipendentistas. Sas positziones de sos clan in argumentos de interessu istatale faghent essire a lughe aspetos fundamentales pro cumprèndere a beru sa polìtica isulana.
In su libru sunt presentes finas anàlisis de sos resurtados eletorales locales.
Unu libru chi diat cumbènnere a bortare in italianu e in sardu.

#Alessandro Michelucci

» in segus